أنا والثانوية

النهاردة هنتكلم عن... المرحومة.. الثانوية العامة
وللأسف أنا مش ناوي أعمل بمبدأ "اذكروا محاسن موتاكم" عشان لو كان في محاسن مكانش دة بقى حالنا

الثانوية العامة هي عبارة عن سنتين من الأشغال الشاقة المؤبدة للطلبة المتفوقين (بس).. دروووووووس ومن الدرس دة للي بعده واللي بعده وهكذا، دة غير كمان المدرسة اللي بتضيع الوقت وبتزود الخنقة للآخر: رغي العيال، صريخ المدرسين والشتايم اللي بتترمي من كل مكان..

الثانوية العامة 18 شهر على فترتين (يعني لو واحدة حامل كان زمانها خلفت اتنين!).. وبين الاتنين شهر راحة بس.. تخيل بقى انتا قضيت الفترة دي إزاي.. كل يوم مدرسة وبعدها الدرس وبعدين ترجع تاكلك لقمة وتريح شوية وبعدين الصحيان وفترة الدح والمذاكرة وعمل الواجبززز (على فكرة دي جمع!).. ودة الروتين اللي بيشل الواحد..

وكل الفترة اللي فاتت دي كوم والشهرين اللي قبل الامتحانات كوم تاني.. كل الكبار بيشبهوهم بالعشر الأواخر من رمضان والاعتكاف... ما فيش خروج.. ما فيش كمبيوتر أو موبايل.. ما فيش وقوف مع الأصحاب بعد الدرس.. ما فيش مكالمات ف التليفون.. إلى آخر القائمة اللي ما بتخلصش.. والواحد مننا تلاقيه مطول شعره ومربي دقنه ومنظره كأنه رايح يجاهد! (إخوان يا بيه؟؟)

الثانوية العامة مرحلة قتل الموهبة والإبداع بقتل الوقت بالانقطاع للمذاكرة بس.. لا وقت للراحة والاسترخاء.. لا وقت للموهبة والهوايات وإن وجد فهو لا يكفي.. لا وقت للحب أو حتى التفكير فيه..

دة بقى غير الامتحانات والغش اللي ملا اللجان بشكل قذر.. وبطرق مختلفة...
دة غير انتظار النتيجة.. وليلة النتيجة اللي كل مصر بتبقى ع النت قلقانة..
وبعد كدة التنسيق ووجع الدماغ... أو حجز دروس السنة اللي جاية..

مش هوا دة السيناريو المنتشر للي ما تتسمى الثانوية؟؟ اللي كل الأهالي بتخاف منها؟؟

حد شاف حلقة العاشرة مساءً اللي كانت الإسبوع اللي فات بتاعة الثانوية؟؟ والسيناريو المتشابه والمشترك اللي حكاه أولياء الأمور؟؟


عندي سؤال محشور ف زوري من سنتين.. هوا إحنا عملنا إيه ف دنيتنا عشان يتعمل فينا كدة؟؟ ولا هما بيخلصوا ذنوبنا مقدمًا؟؟ ولا دة انتقام وعقد وكلاكيع بتطلع علينا؟؟ وقال إيه هيخلوها تلات سنين.. هي ناقصة أصلها..

المهم بقى دلوقتي هو إننا كلنا ف الهوا سوا.. مستنيين النتيجة يا حلوييين بيقولوا هاتطلع قبل آخر الأسبوع الجاي.. أكيد طبعًا وإيه الجديد.. أنا بتوقع إنها هتكون يوم 16/7 ..

ولغاية ها الحين امسكوا أعصابكم.. مش عايزين انهيار عصبي قبل النتيجة (بس بعدها آآآآه)..

على فكرة اللي يعرف مواقع للنتيجة يبعتها وأنا هانزلها هنا أولاً بأول..
سلام يا بشر..