حكاية آية

حد متابع موضوع آية؟؟
ف البداية هديكوا فكرة عن الموضوع:

آية طالبة ف تالتة ثانوي جابت 96% ف تانية وهي علمي علوم. اللي حصل بأى إنه بعد الانتهاء من تصحيح امتحان الأحياء جالها تليفون من حد ف الوزارة بيقولها تعاليلنا بكرة عشان حاجة متعلقة بامتحان الأحياء بتاعك. البنت مكدبتش خبر وراحت. طلع إيه بقى؟؟

كشكول الإجابة اللي عدد ورقاته 12 ورقة مش فاضل منه غير واحدة بس!! طبعًا البنت انهارت وسط اتهاماتهم ليها بإنها هي اللي عملت كدة علامة مميزة ف الورقة!! والبنت هتموت عشان هي كانت خارجة مقفلة وقالت على أسوأ الفروض هتنقص نص درجة، والمشكلة إن إجابة امتحان الأحياء بتاخد كشكول الإجابة كله من الجلدة للجلدة، ف الورقة اللي موجودة دي يادوووووب فيها أ، ب من السؤال الأول بس!!!!
القرار اللي كان هو إن آية تستنى لحد النتيجة ما تتطلع

ولما النتيجة طلعت آية جابت 96% و..... سقطت ف الأحياء.. قالولها هاتخشي دور تاني وتاخدي الدرجة كاملة.. البنت انهارت أكتر لأنها ماعندهاش استعداد تذاكر وتمتحن تاني وخصوصًا إنها أحياااااااء!! والناس تمسكوا بموقفهم ورفضوا أي حاجة تانية..

آية طلعت ف البيت بيتك بتشتكي تاني من الظلم اللي وقع عليها، وكان الوزير قبلها قعد معاها ومع أهلها وقالولها إنتي فعلاً حليتي بس إنتي ناقصة فالسؤال الأول فردت إنها مجاوبة الست أسئلة!! والواضح من درحاتها إنها مش مقفلة ولا مادة (الاقتصاد والإحصاء 49، المستوى الرفيع 9.5، الفيزياء 44).. والحلول اللي كانت قدامها إما إنها تاخد متوسط الدرجات حسب تقدير درجاتها في بقية المواد (يعني هتاخد في الحالة دي 47.5 من 50) أو إنها تدخل الدور التاني!!

آية رفضت القرارين وتمسكت برأيها بإنه من حقها إنها تاخد الدرجة النهائية في الأحياء لإنها مش غلطتها والموضوع ما اتاخدش فيه قرار لغاية دلوقتي...

اللي أنا شايفه إنه باللي آية عملته ف الآخر سقطها من نظري وحطها ف موضع الاتهام لأنها بتتكلم بطمع واتجرأت (يا بنتي انتي مقفلتيش ولا مادة وعايزة تاخدي الدرجة النهائية في الأحياء؟؟؟ أنا لو كنت مكانك كنت أبوس إيدي وش وضهر وأحمد ربنا إن في حد ف البلد دي عبرني!! هو أنا صحيح قفلت الأحياء السنة دي بس حرام واحدة ف موقفك دة تعمل كدة لإن موقفها مش واضح؛ هل هي متهمة ولا بريئة!!) لأ وقال إيه بترد وتقول مهو ممكن الواحد يكون شاطر في مادة وبقية المواد لأة!!

ف الأول آية كانت ف نظرنا مظلومة لأنها عرضت درجاتها ف امتحانات الدروس ورسوماتها ف الكشاكيل لكن دلوقتي لو ما رضيتش تاخد 47.5 وفضلت على موقفها محدش عارف إيه ممكن يحصل، لأن كدة السنة اللي جاية كل مصر هنلاقيها مقطعة ورقها، وسلامات يا عدالة!

أتمنى إنها تقبل الأمر الواقع لإن 47.5 من 50 مش هتفرق كتير في مجموعها عشان الدرجتين ونص دول ميكملوش 0.7%. فبلاش طمع يا آية!