النشرة الثانية

بسم الله يا ساتر


باعتذر على التأخير بس بجد يا جماعة كنت مشغول ع الآخر.. وآديني جيت أهة علشان ما تقولوش وحشتنا


يلللا... استاند بااااااااااي... ثري.. تو.. وان... ع الهوا


سيداتشي آنساتشي سادتشي.. السلام عليكم ورحمة الله وبركاته.. نقدم لحضراتكم نشرة التاسعة.. والمرة دي هندخل ف الأخبار علطول


أنا بقدم النشرة برضة.. ياهووووووووووووووووو... أصلي مش معقولة هتعاقد مع حد غيري يقدم نشرتي يعني... المهم بس أنا عايز أعتذر لأن النشرة مش هاتبقى شهرية أوي لأن الأمر طلع صعب شوية.. الإعداد والكتابة والمراجعة والنشر عايزين وقت وأنا لسة الدنيا ملخبطة معايا


أول خبر معانا الليلة.. ما فيش سياسة.. بصوا.. إحنا لسة خارجين من رمضان ومش ناقصة ذنوب هيّا



نشرة أخبار الحياة:

الدراسة بدأت.. وبرغم الخلافات حول موعد بدئها إلا أنها بدأت رغمًا عن الكل.. رمضان بأة مش رمضان مش فارقة.. والمحاضرات والسكاشن وشغل نااااااار... ووسط الزحمة دي لسة الإنطباع الأول عن كليتي مأثر.. كليتي يا جماعة تحفة.. وأنا فرحان بيها جدًا.. بجد حاسس إني بانتمي للمكان دة.. بغض النظر عن صعوبة الدراسة.. والبنات الرخمة.. والتشريح.. آه أنا عندي تشريح.. وبالرغم من إني مسالم لدرجة إني مش باقتل النمل حتى، إلا إني كنت مضطر لاستخدام العنف مع الضفاديع البريئة.. والله قلبي بيتقطع لسة كل ما أشق واحدة وبتخيل إن دة بيتعمل فيا.. بالرغم من إني مشرح لغاية دلوقتي سبع ضفادع وبطلت ألبس جوانتي من بعد أول واحدة وكمان شعوري بالقرف قل إلا إن شعوري بالقسوة المفرطة والإشفاق على الكائنات الرقيقة دي لسة مسيطر.. يللا بقى نقول إيه: حكم القوي.. لأ وكمان الدكاترة والطلبة الأقدم متعاونين أوي.. الروح اللي مالية الناس هناك جميلة أوي.. بجد حاسس بحب كبير.. ذيس إز ذا تييم إسبيريت والله

وجاء رمضان بعد غياب.. بكل بركاته وروحانياته.. والسحابة السودا كمان زي ما قلت النشرة اللي فاتت.. رمضان السنة دي في حاجة مميزاه عن كل السنين اللي فاتت.. أول سنة ف حياتي أصلي التراويح!! أنا عارف إنها متأخرة أوي الحكاية دي بس بجد استمتعت بيها جدًا خصوصًا إن شيخنا (ربنا يرضى عليه ويكرمه) صوته جميل أوي وكانت صلاته خفيفة وبجد الروحانيات عااااالية أوي.. بس بالرغم من حالة الإيمان والتقوى والأخلاق اللي بتحل ع المجتمع ف رمضان إلا إن الأصل بيبان وقت الزحمة قبل الفطار ف الإشارات.. والزعيق والناس اللي مش طايقة روحها.. بس من أجمل الحاجات في رمضان دة إني ماتابعتش مسلسلات خالص.. اللهم إلا آينجل على إم بس سي أكشن.. وبصراحة كان نفسي أتابع برنامج مصطفى حسني على باب الجنة وبرنامج عمرو خالد الجنة في بيوتنا إلا إن لخبطة مواعيد الكلية حرمتني من المتابعة الكاملة.. بجد برنامجين رائعين.. بس السنة دي أنا زعلان لأني ماختمتش القرآن، وإيه الجديد، أنا ماختمتش ف عمري غير مرة واحدة من أربع سنين!! يللا.. تقبل الله منكم ومنا

وجاء العيد.. بالفرحة والسعادة بالفطر.. وبقبول رمضان على أكمل وجه بإذن الله.. صلاة العيد السنة دي عندنا كانت فاضية.. الناس نايمة مش عارف ليه.. أصوات التكبيبر كانت هادية.. يللا.. المهم الواحد مستني العيدية بقى، مع إني خلاص صرفت نظر عنها لأنها مابقتش بالسخاء بتاع زمان.. يللا بقى هيا جت على دي.. الحاجة مابقاش فيها بركة.. اللبن والعيش والبقسماط والرز والمكرونة والفاصوليا وكل حاجة غليت يمكن عشان كدة القيمة الشرائية للعيدية تضاءلت.. ربنا يسعدنا ويرحمنا وينصرنا.. اللهم ارفع مقتك وغضبك عنا.. واكتب للإسلام والمسلمين نصرًا مؤزرًأ من لدنك.. أصلح ذات بيننا ونفوسنا.. اللهم إنك عفو كريم تحب العفو فاعف عنا.. ربنا هب لنا من أزواجنا وذرياتنا قرة أعين واجعلنا للمتقين إمامًا.. يا ربي لك الحمد كما ينبغي لجلال وجهك وعظيم سلطانك.. والصلاة والسلام على سيد الأنام

نشرة الأخبار التاريخية:

هوا ماحدش ملاحظ حاجة؟ التدوين دة بيجري ف دمنا كمصريين من نسل الفراعنة.. زمان كان الفرعون متعود إن أي حاجة بتحصل ف حياته تستحق إنه يخلدها ف بيجري ويكتبها على أقرب حيطة أو حجر.. ودلوقتي بقى الفراعنة المودرن بيكتبوا على أي حاجة.. البنشات والديسكات.. حيطان الأوتوبيس والمترو.. كراسي الميكروباص.. بس الفارق إن كتابتنا دلوقتي مش هاتخلد زي زمان.. أد إيه إحنا بقينا تافهين وهايفين.. أبشروا.. التخلف يناديكم يا شباب جيلي الذي أحببت أن أدافع عنه!






نشرة الأخبار الداخلية والجوانيات:


عيد ميلادي كان يوم خمسة سبتمبر اللي فات.. بجد كان أحلى عيد ميلاد ف حياتي.. مش عشان بقى عندي 17 سنة.. ولا علشان الإنجازات اللي عملنها ف السنة ال 16.. اتعلمت سواقة وخلصت الثانوية ودخلت صيدلة وفزت بمسابقتين ف القصة القصيرة وحاجات كتيرة.. الجمال كان فى اليوم نفسه.. كان عندنا مناقشة لكتاب تاكسي مع مؤلفه خالد الخميسي.. الجمع اللي كان موجود هناك من أصحابي المقربين لقلبي.. فاطمة (بنت الحياة)، أبو الوفا (جوانيات)، سمر (ذا سول اسكيتشر)، نورا (وايت سي جال) وعلى رأسهم أستاذتي وملهمتي سحر الموجي.. بجد كانت حفلة جميلة وأنا باتلقى منهم التهاني.. أنا أسعد إنسان ف الدنيا بيهم والله.. لأ وأما روحت البيت وبالرغم من إن كان في شدة مع بابا وخد مني الموبايل إلا إني لقيته مصالحني وجايبلي حاجات كنت طالبها من فترة.. بجد يا جماعة.. الأحضان دي غالية عليا أوي.. الحمد لله على كل الناس الرائعين اللي ف حياتي.. يا جماعة اللي بيقرا الكلام دة منكم هيسمعها مني لأول مرة.. بحبك يا أغلى وأجمل وأروع شخص ف الدنيا كلها


معلهش الخبر دة حزين شوية.. حد مات.. آة.. قريبتي الفلسطينية الوحيدة اللي قابلتها ف عمري.. صحيح هيا قرابة بعيدة عني (هي تبقى بنت عم أمي) لكن بجد أنا كنت باحبها أوي بالرغم من إني ماقابلتهاش غير مرة واحدة.. الموتة كانت صعبة.. كانت قايمة من نومها قبل الفجر تتسحر (الكلام دة قبل رمضان بأسبوعين ع الأقل) وبتولع البوتاجاز وللأسف كان في تسرب للغاز فقامت النار مسكت فيها.. وراحت المستشفى والدكتور ف العناية المركزة قال الحالة صعبة والحرق بنسبة 80% ولو ال 48 ساعة الجايين عدوا على خير يبقى هاتعيش.. بس كان قضاء الله نفذ.. وماتت بعد يوم واحد وربنا ريحها.. أنا عرفت بموتها بعده بأسبوع.. بجد أنا هافتقدها جدًا.. ولكن تدمع العين ويحزن القلب ولا يسعنا أن نقول إلا ما يرضي لرب.. إنا لله وإنا إليه راجعون.. أحتسبها عندك في الجنة يا رب


رحلتي لاكتشاف نفسي بتتقدم بسرعة هادية.. وسط دعم أحبائي وتفهمهم.. وسط جو رمضان الروحاني الجميل.. هناك روابط قوية بدأت تتكون بيني وبين روحي.. أتفهمها الآن.. أصبحت أفكر كثيرًا قبل أي خطوة.. لم أعد أطيل الجدال والنقاش الذي لا جدوى منه.. أحاول أن أتفهم من أمامي وأراعي عدم نضجه و مستواه العقلي.. أتعمق في حكمي على الناس وأرى ذواتهم ودواخلهم.. إرادتي وتحكمي في نفسي وهواها أقوى.. أصبحت أحسن الآن لأنني تعلمت أن أؤمن.. إزداد إيماني بربي.. بنفسي.. بأحبائي.. أسعى لأن أكون إنسانًا طاهرًا متدينًا متفوقًا.. إنسان لا يمكن أن تنساه.. أؤمن أنني سأصل له.. دعوت الله وسأظل أدعوه.. يومًا ما سأكون ما أحلم به.. وأبدًا لن يطول انتظاري.. قالتها لي عصفورتي الحرة الغالية.. فقط آمن.. لتصل

عارفين.. حالة زهايمر مالية الجو.. يمكن بسبب الدخان اللي بيجيب تخلف عقلي.. بجد الأمر مضايقني لأني عندي مشكلة في تذكر الأسماء.. ناس كتيرة تبقى عارفاني وأنا مش عارفهم.. ويسلموا عليا وأنا حاسس إني أعرفهم قبل كدة.. بس،.. هوا أنا كنت باقول إيه من شوية؟..... آه..... مين حضرتك؟



النشرة الرياضية:

الأهلي يقضي على معنويات الزمالك في القمة الهادئة.. ويصل إلى نهائي الأميرة الافريقية.. وبإذن الله هانوصل اليابان للمرة التالتة على التوالي ويتحقق السبق للأهلي العظيم.. هوا صحيح المستوى ضعيف بس يارب يتحسن.. وحبيب قلبي متعب يتخلص من سوء الحظ اللي ماسكه دة.. بحبك يا أهلي.. أووووووووووووووو أهلاااويييييييييييي



النشرة الجوية:

السحابة السودا.. زي الزفت كاتمة على نفسنا.. وأنا علشان عندي حساسية وجيوب أنفية حالتي صعبة وماشي بنقط الأنف.. بس خير إن شاء الله.. هاتقل يا جماعة بإذن الله
الجو في العيد مشمس وفي سحب خفيفة.. إحتمال سقوط أمطار ع الساحل علشان أنا مش مسافر.. بس الجو جميل ومناسب للإستمتاع

درجات الحرارة.. هاتقل يا ناااااااااااااس الخريف جه



طيب.. أنا خلصت اللي عندي بأة.. مش عارف حاسس إن النشرة دي كلها داخلية بس سامحوني.. آه على فكرة أنا غيرت المعد السخيف أبو خط وحش.. وكمان المخرج خد استمارة ستة.. دلوقتي آي آم تيكينج أوفر.. أنا المذيع والمعد والمخرج... لولولولولولوليييييييي

يللا.. أسيبكم على كل خير أحبتي في الله.. وأستودعكم الله الذي لا تضيع ودائعه
ولنا لقاء قريب بإذن الله
وحتى نلتقي لكم مني كل التحية والسلام
استمتعوا بعيد مبارك شريف كله جمال وسرور

النشرة الأولى

بسم الله الرحمن الرحيم

مش عارف ليه حاسس إن معاد النشرة متأخر.. كان لازم أبدأها بدري شوية.. ما علينا.. المهم تكمل.. إن شاء الله يا جماعة النشرة دي شهرية

بصراحة كنت عايز أسميها نشرة الأخبار الداخلية بس اكتشفت إن مساحة الفضفضة عندي لسه محدودة ف مش فجأة كدة خبط لزق أفضح نفسي قدام المشاهدين

يللا ما علينا.. ها أبدأ بأة.. هقول إيه؟؟

آنساتي سادتي نقدم لكم نشرة التاسعة ونفتتحها بالعناوين

عمرو بيقدم النشرة يا جدعاااااااااان.. ياهووووووووووو.. والله باقول ع الواد دة مزيع من يومه.. مولود قدام الميكروفون يا نااااس.. إحم.. إحنا ع الهوا؟؟ آه معلهش.. سوري..

نواصل العناوين

مبارك ف العناية المركزة.. إفتكاسة مغرضة.. سلامتك يا عم الريّس.. معندناش غيرك يا مدلعنا يا مشخلعنا.. طنط سوزي طلعت علينا وبتعلن إن الرئيس ميت.. يوووه قصدي (مائة) فل وأربعتاشر وزي الحصان.. يا ستي مين قال إحنا عايزين حصنة؟؟ إحنا عايزين الريس.. وبعدين متخليكي ف المجلس بتاع الأمومة والطفولة ومهرجان القراءة للجميع بتوعك

الحكومة الموقرة برئاسة النظيف قوي تدرس بجدية قرار تأجيل رمضان إلى منتصف أكتوبر القادم للحفاظ على انضباط العام الدراسي

معرض مستلزمات المدارس وياميش رمضان يفتحان جيوبهما لنهب الناس الغلابة وسرق الحديدة اللي هما عليها.. مش كفاية غلّوا العيش واللبن والرز والدقيق والفراخ والبيض و و و و.. لأ ودلوقتي بقة دوشة الأقلام والكشاكيل والجلاد والمكسرات والتين وقمر الدين.. هيا الناس ناقصة؟

ممكن بريك يا جماعة؟؟ أصل خط المعد وحش ومش عارف أقرا!! أكمل؟؟ طيب

بس كدة.. آه لسه أخبار الرياضة

الأهلي يحصد ثلاث نقاط غالية بعد فوزه على أسيك الإيفواري بثنائية لفلافيلو والمبدع أبو تريكة ويصل بسلام إلى نصف النهائي.. ويتصدر المجموعة بعد تعادل الهلال والترجي بهدف لكل منهما.. أووووووو أهلاووووووووووييييييييي

الإسماعيلي خلص بلبطة مع الدلافين ف نيجريا بفوزه بهدف يتيم معرفش مين اللي جابه.. وبكدة يبقى لسه عندهم أمل يكملوا البطولة.. بقى تاخدوا مننا حسني عبد ربه يا ولاد ال... تييييييييييييييت.. الرقابة اشتغلت

طيب باقول إيه.. مكفايانا كدة أخبار.. ونخش ع الفضفضة

كان قد أعلن مندوبنا في وقت سابق أن حالة الإكتئاب لدى سيادتنا قد بلغت مداها وأحجمت عن السفر للتصييف والصياعة.. للأسف في ظل الضغوط الأسرية وسياسة الأمر الواقع اضطريت أسافر الساحل أقضي أسبوع.. وأديني رجعت تاني بعد ما قضيت أجازة هادية ومريحة وممتعة في الجو النضيييييييف والهوا النقي وعملة ريفريشمنت لنفسي قبل الموسم الجاي

المهم إن الواحد كان حاطط للرحلة دي شعار "اكتشاف النفس" زي ما أستاذتي سحر الموجي دايمًا كانت بتوجهنا.. وف حضور روايتها الجديدة نون.. ماقدرش أقولكم قد إيه أنا حاسس إن علاقتي بنفسي اتغيرت.. أتمنى إن الرحلة تستمر وكل يوم أكتشف فيا حاجات حلوة ماكنتش أعرفها وأتغلب على المصايب السودا اللي أعرفها ف نفسي.. قولوا آمييييييييييين

طيب، وبعدين.. أديني أهو معاكم بصدعكم رغيي وأنا عارف أصلاً إن محدش بيقرا.. يعني.. حتة الإنترآكشن أنا مفتقدها شوية.. بس عادي.. حالة التجاهل مسيطرة على كل الناس اللي بيتعاملوا معايا

إيه.. عارف إني لسه عندي كلام كتير أقوله بس هاخليه للنيوز أبديت الجاي
يللا يا بني آدمين
كل واحد يقفز على سريره ويتغنطى كويس لحسن الدنيا بررررد

آه نسيت صحيح النشرة الجوية
يوووووه

من المتوقع هبوب رياح شمالية غربية فادمة من مزارع حرق الرز عشان تعكنن علينا ف رمضان.. الشبورة بتاعة الصبحية بتبدأ من قبل نص الليل وبيبقى لونها أبيض وشاعات رمادي وما قولكوش ع الريحة البشعة

طب ودرجات الحرارة؟؟ أكيد نفسكوا تعرفوا الدرجات الحقيقية بدل الفكس اللي بيتقالكوا

والله يا جماعة لو أعرف ماكنتش هاخبي.. المهم تزود من اتنين لتلات درجات ع اللي بيقولوه.. دة غير الرطوبة طبعًا

يللا.. تقلت عليكم الليلادي
تصبحوا على خير وأحلام سعيدة

@ممكن أقول زي المديعين الكبار يا عمو المخرج
#إتفضل يا حبيبي.. خلصنا يا عم المذيع
@إيه يا عمو مش كدة.. عيييب مايصحش
#ماتخلص يا عم الأمور
@أوكيه.. والله لأقول طنط سوزان حسن.. هة وهيا هتوريك شغلك
#االهم طولك يا رووووح
@وبعدين متضايق من إيه
#ما تخلص يا بني آدم إحنا ع الهوا
@آخ نسيييييت

نشرتنا الإخبارية المسائية الشهرية انتهت.. طاب مساؤكم
:)

#إيه يا عم إنتا؟؟ عاملي فيها مذيع يا بن ال.. تيييييييييييييت